nlenfrde
  • dorpsstraat elsloo
  • Op de Berg
  • Op de Berg gezien vanuit Maasberg

Trampele in Aelse in de corona-tied -Deel 22-

Veer gaon éns kíéke ês geer gêt aan de kraom mót laote rippereere.
Geer zeet op 'ne gezadde daag dat geer mesjíen 'ne pannelêpper nwèdig höb. Dus geer nwèwjt éine óm de ganse petik te kómme bekíéke. Nao väöl gebêl en gesjangeneer kump dae hjèr éntjelings mit z'ne waagel veurgevaare. Geer loup nao bóéte en laot 'm de waagel op de vaart zëtte.
Dao stap e kaelke van óngevjèr 1 maeter 70 óet. Hae zaet dat 'r hieje mót kómme óm nao 't daak te kíéke. Z'ne jóng houw géíne tíét. Hae aevel waal. Hae waor saer e paar maonje mit Drees en mit tóére hulp 'r z'ne zoon óét. Geer staot êffe verpopzak debíé. Dat kaelke liek waal 80 jaor. Z'n gezich is zwa gesjrumpelt wíe 'n óétgedrwègde próem. En de kleur van zíé gezich is zwa gael wie 'ne kwakker ónger z'n pêns. Op z'ne kop haet 'r e saortemënt lósjhoot wooste 6 waeke sop van kéns trékke.

Nao gêt gepaalaaver, haolt 'r 'n lödder van z'ne bestëlwaagel en begint 't daak op te króépe. Veurdat 'r aevel baove aan de kaanjel is, begint 'r te kalle euver de stal dae achter op 't goot stéít. Zwa te zeen is dae pappendëk hjèl slech. Dao mót geer êch gêt aan laote doon anges höb geer éin van dees daag e grwat waaterspeel bénne. Of de baddinge verotte uch woo geer bíé staot. 't Is neet sebíet nwèdig. Geer mót zêllef mèr dizzedeere wat geer doot.

Trampele 22 Elsloo Daalstraat

Es 'r aan de kaanjel kump, begint de pannelêpper e bitje te grauwele. Die zénke kaanjel kén ich waal hie en dao nog gêt läöte Väöl haolt dat aevel neet mjè óét. Zwa te zeen is die snóefrot. Verstènjiger is 't aevel óm 'n ganse nuuj op te hange. Ouch de kaanjelpíép mót geer mèr in éíne kjèr rampleseere. Die doug ouch neet mjè. Trouwes, geer mót mèr zêllef wéíte wat geer doot. 

Dat géít neet zwa goot, aamt geer bíé uch zêllef. Dat géít mich nóé al 'ne róffel gêljt koste. En hae is verdomme nog neet op 't daak. Dan begint de pannelêpper híé en dao gêt panne ewêg te pakke en krup nao de vees. Geer gaot gêt wíer ewêg staon óm 'm te blíéve zeen. Dae krup intösje grèijelings euver de vees, veult en truk híé en dao aan 'n veespan en kump bie de sjouw. Geer ként 't geluive of neet, zaet 'r, mèr hie mót ouch de pljèsteraer kómme. De rènjt baove op de sjouw is ram versjangeleert. Ein van dees daag begint uch de sjouw te laeke en kríeg geer waater op de zölder. Ich kén dat waal zêllef e bitje bíékallefaatere, mèr ich wil géí hauf wirk aafleevere. Eeder z'ne eige stíél zal ich mèr zëGGe. Dat verstéít zich.

Dan géít 'r op z'n aelfendaartigste op de sjouw zitte en begint zich 'n segrëtje te rolle. Hae kik van baove nao uch, dúút êffe aan z'ne lósjhoot en zaet grinsjentaere dat 'r mèr neet van 't paave en van de mëntaas aaf kan blíéve. Nóndetenaer, géit 'r wier, m'n vrouw is óm te verëkke. Die vunjt euveral toebak en mëntaas. Geer zêllef, aevel, dénk, gank mèr wier en sjei óét mit dae noozel. Geer begint te geluive dat geer de verkjèrde pannelêpper höb laote komme.

Trampele 22 Elsloo Opdendries

Ongertösje maak 'r mit 'ne zwaegel z'n segrët aan en wies nao de stal. Op de daag van vandaag höbbe ze väöl baetere pappendëk wie vreuger. Dae van nóé géít väöl langer mit. Taenge de tíét dat 'r versleete is, gwaije ze mit míen knäök de neut aaf. Allein is 'r e stök príezigger. Dat gaef ich uch op e breefke. Geer dénk weer bíe uch zêlf, verrékde zeiveraer, snooter neet zwa en gank wier. 

De blauwe rouk van z'n segrët kringelt ómhwag. Miljaar, zaet 'r óngeréns, ich zeen dat de achternaober 'ne smaer dóéve haet. D'n ouwe van mich waor ouch zwa 'ne richtige dóévemëlker. Dae laog haos daag en nach op de spieker. Es ich 't good höb, houw 'r de stök of tachetig reisdóéve. In 't vlöchsezóén brach 'r eeder waek waal 2 of 3 körf mit dóéve nao 't vereinigingslokaal. En póéle deeg 'r ouch, al waor 't mèr veur e paar knabbe. Veural bie de vlöchte nao Dax in 't zuuje van Frankríék waor 'r zwa opgereech wie tsjwè angere. Hëlgekómbêrves ich geluif dat 'r 3 nachte neet sleep. Hae kalde allein mèr euver z'n dóéve. Euver die of die zíéje, dae of dae häöre, dae blauwe sjêk of die vaal, de piepers, de jäörigge en nog mjè van dae sjaele kal. Ich höb dao nwats aard aan gat. Trouwens m'n mam houw allezelaeve 't smaor in. Die verrëkde dóéve besjeete häör wêsj es die op de bleik laog of aan de wêsjdraod hing. Ouch verrëkde 't rónjtóm de bóét van de vleege en anger óngesiefer. Effe tösjedoor, höb geer géin hinjer van die dóéve? 

Geer gaef gei sjóege en vraog uch aaf wie geer van dat gezauwel aaf mót kómme. Wat 'n verdomde ouw zaeg waor dat toch. En of de dúúvel demit speelt, geer hoof niks te zëGGe. 
Obbéns wies 'r nao de vees en zaet dat die gans gerampleseert mót waere. De veespanne liGGe haos allemaol los en ze weer in de spies lëGGe haet neet väöl baat mjè, géit 'r wier. Ich zal uch mèr neet zëGGe dat de panne eigelik ouch gerampleseert mótte waere. Die gaon ouch neet mjè lang mit. Mèr zwa géít 't mit ós ouch. Es ózze tíét óm is, mótte veer ouch vertrékke, of veer wille of neet. Geer mót mèr van eiges wéíte wat geer aan de kraom wilt laote doon.

Trampele 22 Elsloo drumband

Drumband St. Maarten uit Elsloo marcheert anno 1971 door de Pastoor Dubarstraat met op bijna alle daken een televisie-antenne. (Foto Jan Betlem)

Vreuger , in de jaore zestig pës näögetig, sting ouch nog op eeder daak 'n tillevizie-antên. Dat waor mich allezelaeve e gesjraavel óm die,goot vas te maake zonger dat de panne of de vees kepot ginge. En dan dat richte van die klómmele óm 'n goot beeld op de TV te kríége. Sakkerdjuu, dao waore ze méístes óére mit besjêftig.

Hae zit nog op de sjouw en gwéíjt 't stumpke van z'n segrët nao óngere. Dan haolt 'r e beukske óét z'n vottetêsj en begint ein en anger op te sjríéve. Geer begint uch wie langer wie mjè op te ríéte en geer trach 'n mäögelikheit te vénje óm van dae pannelêpper aaf te kómme. Dae maak uch de pis héít. En of de duuvel demit speelt, kump de hulp óét 'ne ónverwachte hook.
Ha, Sjang, bëste weer ês hëGGaffekaat aan de gang, kump 'n stöm vanaaf de straot. De pannelêpper kík nao veurbóéte en stuk e hènjt ómhwag. Zwa wieste zúús, kén ich 't neet laote, zaet 'r, en begint zich weer e segrëtje te rolle. Bëste Zaoterdig ouch nao Fortuna gewaes, ging 'r wier. Dat waor weer 'ns klwatte. Ich zëG haos allezlaeve dat 't míéne lëste kjèr is gewaes, mèr ês 't weer zwa wíét is, gaon ich toch weer nao die botte keu kíéke. Dao kaom 'n ènjtwoort wat geer neet kènt verstaon. Sjéí mèr óét zaet Sjang.'t Weurt neet baeter drop. Ze mótte de speelers mèr breuk gaeve mit têsje. Dan wéíte ze woo ze hun hènj mótte laote en hoove ze zich neet meug te maake. 't Enjtwoort ként geer weer neet hwèrre. Jao, pës éin van dees daag, zaet Sjang.

Hae kik weer eure kènjt op, gweijt z'n segrët ewêg, géít van de sjouw aaf en sjraavelt weer euver 't daak nao de lödder. Es 'r ónger kump, zaet 'r dat 'r z'ne zoon 't ein en anger zal doorgaeve en dat geer waal éin van dees daag gêt zult hwèrre. Geer höb nwats van ze laeve zwa gaer éíne zeen aafhóuwe.

Trampele 22 Fortuna54 Mauritsstadion

Fortuna '54 in het Mauritsstadion in Geleen (Foto Wikipedia)

 

Zónger richtig Aelser plat op sjwal
Greujt 't Holles plat wie kwal.

Ich wil 't mèr gezag höbbe.

Jo van Sjef van An óét de Hei.

 

De voorgaande Trampel-verhalen van Jo Cobben kunt u hier lezen >


Voetnoot:
Regelmatig ziet u in de tekst woorden staan met de G in hoofdletters. Zoals bijvoorbeeld liGGe of zëGGe of óéteréínlëGGe.
De schrijver doet dat om duidelijk te maken dat het een klank betreft die het midden houdt tussen een g en een k. Je spreekt het uit zoals "egg" in het Engels.

Cookies
Voor het optimaal functioneren van deze website worden cookies op uw computer geplaatst. Daarbij worden geen persoonlijke gegevens opgeslagen. Door op ‘Akkoord’ te klikken, accepteert u het plaatsen van cookies. Als u cookies weigert, kunt u de website gewoon blijven gebruiken maar dan werken de website of onderdelen daarvan mogelijk niet optimaal.