nlenfrde
  • Op de Berg
  • Op de Berg gezien vanuit Maasberg
  • dorpsstraat elsloo

Trampele in Aelse in de corona-tied -Deel 9 -

Wie ich lës langs 't voetbalvêljt van Haslou leep, mós ich trukdénke aan dae tíét wie dat vêljt nog in de baenjt laog. Veur ich aevel dao euver gaon sjríéve, wil ich effe get vertëlle euver de gesjichte van Haslou.

De jêste voetbalclub woor opgerich op 4 april 1922 en sjreef zich RKEFC (Rooms Katholieke Elsloose Football club). Wie geer ként zeen, kalde ze dóe al éngels!! 't Vêljt laog achter bösbedríéf Heythuisen. Dees club ging aevel al in 1926 euver de kop.
In 1931 woor 'n nuuj club opgerich ónger de naam EVV (Elsloose Voetbal Vereniging). Ouch die club speelde mèr 2 jaor. 't Vêljt laog op de hook Schutterstraat-Veestraat.

Begin 1941 kaom pestwar Helgers mit de veurslaag 'n voetbalclub op te richte. De Pruuse houwe haos alle vereiniginge verbaoje. In 't dörp waor daodoor niks te doon. De Pruuse vónje 't waal good dat de luuj aan sport deege. De pestwar vónj genóg Aelsenaere die zich wouwe aanstrênge óm zwa 'n club op te richte. Op 1 Juli 1941 woor Haslou gestich, o.a. door dokter Gielen en de hjèr Stassen.

Vanaaf 1942 maogde ich haos eedere Zóndig mit míéne pap nao 't voetballe. Hae zat mich dan achterop de draeger van zíéne fits. Dae fits houw hêl bènj. Die woore méístes gemaak op de koel van e saortemënt rubber. Dat waor hjèl gêt anges es die bènj van vandaag de daag. De fits rammelde dat 't verrèkde. 'n Fitsebêl houwste ech neet nwèdig. Eederein hwèrde dich aankómme. Es veer aan de Maasberg kaome, mós ich allezelaeve van de fits aaf. Veer leepe dan pës ónger. De Maasberg waor in dae tíet neet väöl mjè es e keezelpaat. Dus te gevjèrlik óm 'm aaf te fitse.

Trampele Coronatied Haslou 03

't Voetbalvêljt laog lénks langs de waeg van Aelse nao Gäöl. Ongevjèr 'n 100 pês 200 maeter veur de "dwarsdíék" dae in de wéíje liGG. Dat voetbalvêljt waor gewoon 'n wei mit 2 goole. Tsjeu óét de Meule (fam.Lenssen) houw die wéi veur 'ne sókkere niks aan Haslou verpach. 'ne Graasmjèjer houwe ze neet. 't Graas woor aevel aafgedaon door de keu die dao rónjt leepe. 't Verstéít zich dat me veur 'ne mêtsj de kooflatte mós spreije of opruime. Veur de spas woor waal 'ns éíne "vergaete". Ouch de moutheuvele móste gespréít en opgeruimp waere.
Geer ként uch veurstëlle dat 't vêljt neet zwa glaat waor wie e biljartlaake wie vandaag de daag. Mèr daodoor gebäörde waal dénger woo óm gelache kós waere.

Kalk óm de streepe te trèkke houwe ze ouch neet. Die streepe trókke ze aevel mit zaegmael dat ze mit kar en paert bíé sjríénemaekers in Gäöl of bíé Bours in Katsep haolde. Ouch houwe ze géin keet of zwa. Dus es 'n sjóel raenge kaom woor eederein zeiknaat. Dao stónge jus get búim wooste kós sjóéle. Mèr in de wéntjer höbbe die min blaajer. Dus väöl hólp dat neet.

Geer ként uch lichelik neet veurstélle wie 't vêljt nao 'n sjóel óétzaog. De luuj móste dan door 't naat graas baaje. Es 't graas dan gêt hwag waor, kreege ze naate pwêt. Door dat getrampel óm 't vêljt ónstónge paetjes van sladder. Behauve naate veut, begaaide ze zich ouch nog hun sjoon. Degene dae klómpe aanhouw, houw dao géin las van. Dat verstéít zich. Ich kóm laater nog te kalle euver de meneer wie en woo de voetballers zich móste ómkleije.

 

Ouch 'n aafrastering houwe ze neet. Dat wilt neet zëGGe dat de luu zich in dae tíét allezelaeve goot gedrooge en sjwan achter de líéne bleeve. Om de dwaije dwat neet. En 't snootere en sneure is van alle tíét. Omdat 't vêljt naeve de Hemelbaek en de bosj laog, mós de bal geréígelt óét de búim en de baek gehaolt waere. Dat woor gedaon door de al gêt ouwer jónges. Dat leep aevel neet ummer op rölkes. Es eine euver de baek mós sprénge, gebäörde 't waal éns dat 'r in 't waater terêchkaom. Es 'r gelök houw, kreeg 'r alléin mèr naate veut. Houw 'r pech en veel 'r zwa lank es 'r gewasse waor in de baek dan mós 'r héíves gaon óm zich óm te trékke of leep 'r de ganse naodemiddig harsstikke naat rónjt. Bleef de bal in 'ne boum hange dan mós weer éine in dae boum króépe óm 'm dróét te haole. Geméínlik leep dat waal goot aaf. Hwagóét 'n vief in 'n brook en dat waor 't dan. Kreeg 'r alléin bíé hun op z'ne soodemíeter en mit tóére ouch nog gereete.

Trampele Coronatied Haslou 04

Gemeinlik houwe ze mèr 2 bêl. Euver dae bal mót ich effe gêt óéteréínlëGGe. Dóé hóus 'ne bénne- en bóétebal. De bóétebal waor gemaak van stökskes laer van ca. 4 bíé 10 sentemaeter, die aanéín genjèjt waore. Dao waor 'n äöpening van óngevjèr 6 sentemaeter laank, woo de bénnebal nao bénne geduut kós waere. De bénnebal waor van e saortemënt rubber, wie 'ne bénnebènjt van 'ne fits. Dae woor in de bóétebal geduut en dan opgepómp mit 'n fitsepómp. De äöpening woor dan tóegebónje mit 'ne laere ríestartel. Kaom zwa 'ne bal in 'n däörehëk en ging 'n däöre door 't stiksel dan leep dae laeg. Houwe ze géíne angere bal, dan woor gewoon 'n extra rös gepak óm de bal te plêkke.

Dao waore 3 maote bel. De kleinste veur de kénjer, de middelste veur de A en B aelftalle en de grwaatste veur 't jèste en anger aelftalle. Nóé mót geer wéíte dat, es 'ne laere bal naat weurt, dae bal zeeker 2 kjère zwaorder weurt. Dae waogde dan óngevjèr aeveväöl wie 'ne basketbal. En dat waor veural te mirke bíé 't köppe. Houw daegene dae köpde de pech dat 'r de bal op z'ne kop kreeg woo dae toegebónje waor mit dae riestartel, dan leep 'r zeeker 'n hauf óer rónjt mit dae aafdrök op z'ne veurkop. 

Veur ich wíer gaon, wil ich uch óéteréinlëGGe woo de naam Haslou vanaaf kump. Zwa tösje 875 en 900 ginge de Noormanne strúípentaere door versjéíje lènj. Dat deege ze vanaaf kampemënte. De geljèrde zeen zich nog neet éínig, mèr lichelik waor zwa e kampemënt ouch in Aelse. In de ouw gesjrifte kómme veur Aelse o.a. de naame Aschlo, Ascloha en Haslo(n) veur. Haslou is, wie geer ként zeen, geneump nao Haslo(n). Woo de klankverbastering vanaaf kump, is neet te verklaore.

Op 'ne gezadde Zóndig in 1941 kooste de Aelsenaere die wouwe voetballe zich aanmêlje. En 't leep störm. Dao waore mèr êffe 108 man die zich bíé de nuuj club wouwe insjríeve. Dao waore aevel ouch 'n 30 man bíé die al bíe Caesar(kamp) óét Baek voetbalde. Dokter Gielen, de veurzitter van Haslou, wou die neet höbbe. Dat waore "deserteurs", zag 'r. Laater is 'r aevel bíégedrèjt.

Ich wil uch nog 'n hjèl sjwan gesjichte vertëlle euver de aanvraog bíé de NVB {Nederlandsche Voetbalbond} óm 'n nuuj club op te richte. In dae tíét kreegste géin permisje ês 't voetbalvêljt bénne 30 menuute "gaans", dus loupentaere, vanaaf 't vêljt van 'n anger club laog. In 'ne breef van de Hjèr Stassen, de sikkertaares van Haslou, sjreef dae, dat 't vêljt 35 menuute "gaans" van 't vêljt van Caesar laog. Dat vêljt van Caesar(kamp) laog in dae tíét woo nóé de oprit van de autowaeg nao Mestreech is. Lichelik haet de Hjèr Stassen getrampelt en geklênjert en neet doorgeloupe. De NVB waor 't éínig mit Stassen. In Baek waore dóe 2 voetbalclubs. Doordat nóe zwaväöl leeje nao Haslou euverleepe, zeen die 2 clubs in 1944 gefuseerd.  

Wíe kaom 't bestuur van Haslou nóé aan de kleure zwart en wit veur de kleijing? Ze houwe neet väöl mäögelikhéíte door d'n aorlog. Gekleurde hummes waore zwa wíe zwa neet te kríége. Mèr eederéín houw waal e wit humme of bloes. Zwarte stóf houwe de luu in Aelse waal genóg. De vrouwluu leepe in dae tíét haos 't ganse jaor in rouwkleier rónjt. Dus eederein dae voetballe wou, koos zich e zwart breukske laote njèje door de mam of éin of anger tant. De haoze mit zwart-witte streepe woore gestrik door wéít ich waeme. Ze waore ouch neet allemaol 't zelfde. 'T éi paar haoze houw smaal witte streepe, 't anger paar houw brei witte streepe. Dat laog gans draan of degeene dae ze gestrik houw väöl of min wit of zwart gaare houw. Daodoor leepe ze dus bekans allemaol mit versjeije haoze aan.

Wíe kaome de speelers aan voetbalsjoon? Dat is e gans epaart sjaapíeter. In d'n aorlog waor zwa goot es alles op de bón. Zónger bón kooste niks gêlje, behauve op de zwarte mêrt. Wou d'n éín of angere zich nuuj sjoon gêlje dan mós 'r zich mêlje bíé de Hjèr Stassen. Van dae kreeg 'r bónne woomit 'r zich bíé de sjóester sjoon koos gêlje. Méístal dóérde dat maonje. Daobíé kaom ouch nog dat die klómmele hjèl kosspeelig waore. Väöl luuj kooste zich dat neet léíste. Daoróm woor nogal éns getóésj. De lénksbóéte gaof zíéne  rêchtersjoon aan de rêchsbóéte. De rêchsbóéte op zíen bäört gaof zíéne lénkersjoon aan de lénksbóéte. En nóé mèr houpe dat ze óngevjèr dezelfde maot houwe. Nao de kleur woor zwa wie zwa neet gekeeke.

Omdat Haslou géin keet of zwagêt houw, zaogste zwa taenge hauvertsjwè 't zóndesmiddes, de speelers in vol voetbaltenuu nao de baenjt trëkke. Of op de fits óf te voot. Waor 't waer neet al te goot, dan houwe ze euver hun voetbalkleijer hun zóndesse kleijer aan. Es ze dan bíé 't vêljt kaome, deege ze hun jeske, brook en euverjas óét en hinge die euver de fits. Geer mót wéíte dat ze in dae tíét géin "trainingspakken"houwe. Die zeen väöl laater óétgevónje.

Omdat de mêtsj óm 2 óére begoos, houw pestwar Helgers 't lof mótte verzëtte van 3 nao 6 óére. Haezelf houw de aanzët gegaeve óm Haslou op te richte. Nóé koos 'r neet beginne te snootere of te zeivere dat de luu leever nao 't voetballe ês nao 't lof ginge. Hae haet zich trouwes ouch nwats beklaag.

Trampele Coronatied Haslou 02

De voetballers van de bezeukende club kooste zich ómtrëkke in 't paatroonaat (gelaege taenge-euver kaffee Auwt Aelse, noe appartemënte). Daonao móste ze dan te voot of mit de fits nao de baenjt. Dat paatroonaat deende ouch ês vereinigingslookaal.

Es de sjéítsrechter veur rös houw geflöt, ginge de speelers versjéíje dénger doon. D'n éíne ging zich op zie gemaak e segrëtje rouke. D'n angere drónk zich get óét 'n beugelflesj woo waater, tjè of gazeuse-limmenaat in zaot. Die flesj houw 'r zelf mitgenómme. Weer 'ne angere ging achter 'ne boum staon óm z'ne kleine hjèr de grwatte waerelt te laote zeen. Weer angere stónge gewoon mit de luu te ouwhoore.

Doordat in dae tíét nurges gêt te doon waor, kaome allezelaeve 'ne houp luuj nao de baenjt. Tösje de 100 en 150 man, waor gans normaal. Trouwes, 't waor ouch verbooje óm zónger permisje wier ês 5 km. van d'n hóés aaf te gaon. Waor de mêtsj aafgelóúpe, dan ginge de voetballers van de bezeukende club truk nao 't paatroonaat. Dao kreege ze dan e kumpke mit koud waater óm zich te wêsje en hun zóndesse kleijer aan te doon.

De voetballers van Haslou waore in 2 pertieje te verdéíle. Ein pertie ging óngewesje en in sport-tenuu héíves óm zich dao te wêsje en óm te trëkke. De anger pertie speulde zich in de Heemelbaek de sladder gêt van hun béin en êrm en ginge zich éíne pitsje in d'n éín of angere kaffee. Ze houwe allezelaeve 'n raej. Ofwaal ze móste zich éíne op 't verlees ofwaal op de wéns drénke. Méístes bleef 't neet bíé éin of tsjwè glaazer. Dat verstéít zich.

Mit de kómplemënte van Jo van Sjef van An óét de Hei (van de Platte Aelsenaer) 


De voorgaande Trampel-verhalen van Jo Cobben kunt u hier lezen >

Voetnoot:
Regelmatig ziet u in de tekst woorden staan met de G in hoofdletters. Zoals bijvoorbeeld liGGe of zëGGe of óéteréínlëGGe.
De schrijver doet dat om duidelijk te maken dat het een klank betreft die het midden houdt tussen een g en een k. Je spreekt het uit zoals "egg" in het Engels.

Voor het optimaal functioneren van deze website worden cookies op uw computer geplaatst. Daarbij worden geen persoonlijke gegevens opgeslagen.
Door op ‘Akkoord’ te klikken, accepteert u het plaatsen van cookies. Als u cookies weigert, kunt u de website gewoon blijven gebruiken maar dan werken de website of onderdelen daarvan mogelijk niet optimaal.